Teks Drama Sederhana Bahasa Jawa

 DRAMA BAHASA JAWA SEDERHANA

Tema : Takon Tugas marang Guru

 

Paraga :

1. Bu Aning (guru)

2. Bu Reni (guru)

3. Neni (murid)

4. Anik (murid)

Narasi :

Teng.. teng… teng.. (swara bel ngaso wis muni). Bocah-bocah ambyur metu saka kelas kabeh gruduk-gruduk tumuju kantine Pak Supri ing sisih wetan parkiran. Nalika kabeh padha umek arep njajan, Neni lan Anik malah umek perkara tugas basa Jawa sing diwenehake Bu Aning ing jam kapisan.

Neni	:	“Iki mau ke tugase oleh lo Nik ditulis tangan ke!”
Anik	:	“Ora oleh Nen. Ngendikane Bu Aning ke diketik banjur diprint. Andekna yen diprint rak ya malah luwih apik to asile?”
Neni	:	“Niiing, panulisan kuwi mengko ya mlebu ing point penilaian apa ora? Yen ora, hla ya gek apa bedane karo sing ditulis tangan?”
Anik	:	“Ya embuh Nen. Yen kuwi aku ya ora ngerti. Wis ngene wae, amrih genahe ayo takon wae. Mumpung sik jam ngaso iki.”
Neni	:	“Yaw is ayo. Aku mau ya wis sarapan kok neng omah.”
Ing ruang guru
Bu Reni	:	“Jenengan iki mau saka kelas ngendi dek Aning?”
Bu Aning	:	“Kelas X MIPA 1, Mbak. Kelas favorit kono kuwi.”
Bu Reni	:	“Ngendikane Bapak/Ibu guru liyane ya ngono lo. Eh Dek, meterine jnengan tekan apa sing kelas X?”
Bu Aning	:	“Iki ngancik unggah-ungguh basa Mbak. Bocah-bocah dakjak nggawe teks pacelathon. Jenengan piye?”
Bu Reni	:	“O.. ya padha nek ngono.”
Thok.. thok.. thok.. (swara wong nothok lawang)
Neni	:	“Assalamualaikum Bu..”
Bu Aning	:	“Waalaikumsalam.. Oh Neni karo Anik. Kene mlebua nduk. Nggoleki sapa to?”
Anik	:	“Badhe manggihi panjenengan Bu.”
Bu Aning	:	“Aku? Piye ana apa? Kene karo lungguha kene!”
Neni	:	“Inggih Bu.”
Bu Aning	:	“Piye.. piye? Ana apa?”
Anik	:	“Ngeten Bu, kula kalih Neni menika badhe nyuwun pirsa perkawis tugas ndamel teks pacelathon ingkang kalawau Bu.”
Bu Aning	:	“O iya, piye?”
Anik	:	“Menika wajib dipunketik lajeng dipunprint nggih Bu?”
Bu Aning	:	“Oo.. ya iya to. Amarga mengko asile kuwi arep dakjilid banjur taklebokne ing perpustakaan kanggo koleksi ing perpustakaan. Mula ukuran kertas, jinise tulisan, lan aturan liyane wis tak tentokne.”
Anik	:	“(Bisik-bisik) ke.. iya to Nen, kandhani kok..”
Neni	:	“(Ngguyu kecelek) hehehehe… iyo Nik.”
Bu Aning	:	“(mesem) wis gambling cah? Mengko ya sampekna karo kanca-kanca sing durung mudheng ya, supaya kabeh gambling.”
Neni	:	“Inggih Bu. Menwai ngaten kula kaliyan Anik wangsul dhateng kelas malih, Bu. Matur nuwun Bu (karo salim)”
Anik	:	“Matur nuwun Bu Aning (karo salim)”
Neni + Anik	:	“Assalamua’alaikum”
Bu Aning	:	“Iya, wa’alaikumsalam.”